खुलताबाद, (प्रतिनिधी): वेरुळ येथील बारावे ज्योतिर्लिंग श्री घृष्णेश्वराचे बंद करण्यात आलेला गाभारा दर्शन पुन्हा सुरू करण्यात आला आहे. त्यामुळे शिवभक्तांमध्ये आनंदाचे वातावरण पसरले आहे. जय भोलेचा गजर करत शिवभक्त घृष्णेश्वराला स्पर्श करून दर्शन घेत आहेत.
श्री घृष्णेश्वर मंदिराचे वैशिष्ट्य म्हणजे येथे येणाऱ्या प्रत्येक सामान्य भाविकाला थेट ज्योतिर्लिंगावर डोके टेकवून किंवा स्पर्श करून दर्शन घेण्याची पद्धत पूर्वीपासून चालत आहे. देशभरातील ज्या मोजक्या ज्योतिर्लिंगावर डोके टेकून दर्शन घेण्याची परवानगी भाविकांना आहे. त्यामध्ये घृष्णेश्वराचा समावेश होतो. मात्र काही दिवसांपासून नाताळाच्या सुट्ट्या आल्याने देशभरातील शिवभक्त दर्शनासाठी वेरूळ नगरीकडे येत होते. ही संख्या लाखोंच्या घरात जात असल्याने या सर्व भाविकांना घोषणेश्वराचे लिंगावर डोके टेकवून दर्शन देणे अशक्य होते.
ही गर्दी वाढत चालल्याने यावर उपाय म्हणून गाभाऱ्यात दिले जाणारे दर्शन २७ डिसेंबर रोजी दुपारपासून बंद करण्याचा निर्णय व्यवस्थापनाने घेतला होता. घृष्णेश्वराच्या दर्शनाकडे दर्शनासाठी येणारे भाविकांची संख्या थोड्या प्रमाणात कमी झाल्याने नवीन वर्षाच्या प्रारंभापासून शिवभक्तांना पुन्हा घृष्णेश्वराच्या दर्शनासाठी गाभाऱ्यात सोडण्याचा निर्णय व्यवस्थापन यांनी घेतला व त्यानुसार गाभारा दर्शन सुरू करण्यात आले आहे. यामुळे शिवभक्त मध्ये आनंदाचे वातावरण पसरले असून जय भोलेच्या गजरात शिवभक्त घृष्णेश्वराचे माथा टेकून दर्शन घेत आहेत.
